Meer oor ons

Iets meer oor my (Deon Loots) se eie reis van dissipelskap

Ek het my bediening in 1984 begin in Zambië in 'n sinodale pos vir die jeug. In daardie tyd was daar baie toegewyde jongmense wat alreeds hoërskool voltooi het, maar nog nie kon werk kry of verder studeer nie. Ek het dus 'n aantal van hulle uitgenooi om my "mede-werkers" te word. Dit het natuurlik behels dat ek hulle eers toegerus het met beide kennis en vaardighede wat nodig sou wees. Daar het ek alreeds ontdek hoeveel makliker die pad word as 'n mens doen wat Jesus ons beveel het om te doen, naamlik om dissipels te maak en nie alles self te probeer doen nie.

Aan die einde van 1991 het ek 'n beroep aanvaar na Port Elizabeth as studenteleraar by die destydse Universiteit van Port Elizabeth. Ek was nie baie lank daar nie, toe het ek weer baie duidelik ervaar dat die Here van my vra om "dissipels te maak". Dit was die begin van my meer gedefinieerde reis rondom dissipelskap. Aanvanklik het ek van week tot week materiaal voorberei wat ons dan in 'n kleingroep saam deurgewerk het.